वेद हजारो वर्षे मौखिक परंपरेने चालत आले आहेत. प्रत्येक वेदाची पठणपरंपरा भिन्न आहे. एखाद्या वेदाची पठणपरंपरा नष्ट झाली की तिचे पुनरुज्जीवन करता येत नाही. काळाच्या ओघात अनेक वेदशाखा नष्ट झाल्या.वेदाध्ययन करणा-यांची संख्या मोठ्या प्रमाणात कमी झाली. त्यामुळे या वेदाध्ययनाच्या परंपरेचे रक्षण करण्यासाठी सभेने वेदांच्या ध्वनिमुद्रणाचा प्रकल्प हाती घेतला. सभेचे तत्कालीन अध्यक्ष कै. जयंतराव टिळक यांच्या पुढाकाराने आणि संस्कृत भाषेचे व्यसंगी विद्वान डॉ. श्री.शं. बहुलकर यांच्या मार्गदर्शनाखाली हा प्रकल्प संपन्न झाला. डेन्मार्क शासनाकडून सभेला सात वेदशाखांचे ध्वनिमुद्रण प्राप्त झाले. सभेने ऋवेद, सामवेद (कोथुम शाखा) यांचे ध्वनिमुद्रण पूर्ण केले असून सामवेदाच्या राणायनीय शाखेच्या काही भागाचे ध्वनिमुद्रण पूर्ण केले असून उर्वरित भागाचे ध्वनिमुद्रण लवकरच पूर्ण करण्याचा संकल्प आहे. या ध्वनिमुद्रण प्रकल्पांतर्गत सभेने सामान्यांना वेदवाङ्मयाचा परिचय करून देण्याच्या उद्देशाने “वेदपरिचय’,” सार्थ रुद्राध्याय’, ईशावास्योपनिषदृ विकृतिपाठ’ (विकृतिपाठ विवरणासह) या ध्वनिमुद्रिका तयार केल्या.